香港駕駛者一定深刻感受到香港道路揸起上來好多地方都好爛，唔平，避震硬車行會跳到好似坐船，有時落完大雨又會有大窿，唔小心中咗個避震可能就咁玩完。大家通常因道路保養不善而令自己部車損毀炒車，都只會大嘆黑仔，自己出錢維修啦。

但原來路政署設有索償機制，只要車主證明到車輛損毁與道路保養不善有關就可以追討維修費。其實依個機制問10個車主可能得1個知，原因係政府完全冇宣傳過有依個索償機制。連専業界別人士都未聽過，過去3年，路政署只接獲共40個索償申請，平均每個月得1宗，可以見到幾少人知道啦。

事實上，香港唔少道路已經日久失修，五勞七傷。全港多區，發現多條損毀道路，如在北角東區走廊上橋支路、紅磡漆咸道北，路面均有不同程度的凹凸不平，而在大埔大昌街、汀角路，更分別出現三至四吋深的凹位，車主駛經以上地點時，隨時中招。

如果想索償點做好？

如果想成功索償，最好第一時間影低架車情況，同埋向警方報案，車主即時報案，警方可成為有力的第三方證人，證明車輛因道路損毀引致損傷。如資料齊全，索償最快可於一個月內完成，賠償金額則會因當時損毁程度而調整。

所以次大家唔小心出現交通意外，又知道可能因為道路問題造成，就記得試下向路政署索償啦。

更多其他資訊，按入再睇