各類資產升值，繼公屋升見500萬元後，車位亦水漲船高首見「五球」成交。西營盤維港峰，一個1樓14號車位，上月底以518萬元售出，創全港住宅車位新高，買家前後斥資8,855萬元掃兩個單位及3個車位。

(成交車位圖)

對上最貴車位為西半山干德道璈珀，一個1樓車位，去年9月以480萬元易手，紀錄只保持9個月，就被維港峰打破，而全港首5大最貴車位，維港峰已經佔左當中4個。可能因為以125個住戶計，車位分配接近2戶先分配到1個車位，為豪宅來講，車位供應算少，住係度個個有錢，一定好多人超過1部車，車位都一定炒高。

(其實一街之隔就有月租$3000車位。)

維港峰樓書資料顯示，車位位處單邊，而且係全個物業最大的車位，長5米，闊3.5米，比屋苑其他標準車位2.5米闊1米，總面積約188方呎，更大過唔少劏房住宅，不過成交價都足夠買入一個新盤住宅。依家真係可以話車位貴過樓，500萬元可以買到港島新盤。例如北角新盤尚譽，全部500萬元有找。二手盤都大把選擇，例如天水圍嘉湖山莊三房戶，近期造價465萬元。